Sot, në zyrat e Odës Tregtare KosovaroTurke, u mbajt mbledhja e Komitetit Ligjor

20.01.2025

20.11.2025 - Me ftesën e Drejtorit Ekzekutiv Meriton Sunduri sot në zyrat e Odës Tregtare Kosovaro Turke, u mbajt mbledhja e Komitetit Ligjor. Takimi u drejtua nga Kryetarja e Komitetit Ligjor, znj. Njomëza Zejnullahu, njëkohësisht përfaqësuese e kompanisë Lex Business, me pjesëmarrjen e Nënkryetarit z. Sami Rexha, përfaqësues i kompanisë KEDS, anëtarëve të Komitetit znj. Qendresa Bajraktari dhe znj. Vesa Vokshi nga kompania Vala Consulting si dhe z. Misim Fetahu nga Banka TEB. Në takim ishin të pranishëm gjithashtu Kryetari i Komitetit të Financave, z. Amir Dermala nga kompania BDO Kosova, dhe Kryetari i Komitetit të Tregtisë, z. Shabi Ramadani nga kompania Albi Commerce.

Në mbledhje u diskutuan pikat kryesore si më poshtë:

• Ligji për Shoqëritë Tregtare, përfshirë komentet dhe sugjerimet nga OTKT si dhe organizimi i takimit me ARBK.

• Ligji për Procedurat Përmbarimore, ku është trajtuar mundësia e adresimit të një ankese formale tek Këshilli Gjyqësor të Kosovës rreth çështjes së kërkesës për nënshkrimin e faturave nga ekzekutuesi dhe pranuesi i faturës që është pjesë e procedurave aktuale ligjore.

• Përfitimet e kompanive nga procesi i arbitrazhit dhe mundësia e themelimit të një institucioni të arbitrazhit brenda Odës Tregtare Kosovaro Turke.

Në takim u trajtuan gjithashtu sfidat dhe pengesat e shumta me të cilat po përballen bizneset në aktivitetet e tyre të përditshme. Çështjet e ngritura përfshinin kompleksitetin e procedurave administrative, barrierat ligjore dhe rregullatore, si dhe vështirësitë që lidhen me zbatimin e praktikave të qëndrueshme të biznesit.

Në këtë kuadër, Oda Tregtare Kosovaro Turke riafirmon përkushtimin e saj për të vazhduar organizimin e mbledhjeve të komiteteve, ku ekspertët dhe përfaqësuesit e bizneseve mund të ndajnë shqetësimet dhe propozimet e tyre.