Oda Tregtare Kosovaro Turke Themeloi Komitetin e Tregtisë

11.11.2024

 Oda Tregtare Kosovaro Turke (OTKT) në përputhje me Rregulloren për Organizimin dhe Punën e Komiteteve, themeloi Komitetin e Tregtisë. Në takimin themelues të Komitetit morën pjesë përfaqësues nga Albi Commerc, Atlantik Group, banka TEB, Burak Shpk, dhe Ananas Impex.

Drejtori Ekzekutiv i OTKT-së Meriton Sunduri, në fjalën e hapjes foli për themelimin dhe aktivitetet e Odës. Sunduri gjithashtu përmendi Komitetet e krijuara deri më tani dhe shpjegoi fushat e veprimit të Komitetit Ligjor dhe Komitetit të Financave. Ai theksoi se qëllimi i komiteteve është të mblidhen çdo tre muaj për të diskutuar çështjet aktuale dhe për të thelluar bashkëpunimin, duke ndjekur një parim pune me dy faza.

Në komitete, do të diskutohen njëherazi çështjet e ngritura nga Kryetarët e Komiteteve ose Bordi Drejtues dhe kërkesat që vijnë nga kompanitë. Kështu, kërkesat e kompanive, pasi të shqyrtohen në komitet dhe të konfirmohet përshtatshmëria e tyre ligjore, do të mund të miratohen si qëndrim zyrtar i OTKT-së nga Bordi Drejtues

.

Pas prezantimit të aktiviteteve të OTKT-së përfaqësuesit e kompanive diskutuan për fushat e tyre të veprimtarisë dhe shprehën kënaqësinë për faktin që çështjet kryesore të sektorëve po adresohen përmes Komiteteve. Në përputhje me Rregulloren, Komiteti i Tregtisë është themeluar me 5 anëtarë. Si Kryetar i Komitetit, me njëzëri u zgjodh Shabi Ramadani përfaqësues i Albi Commerc. Ndërsa, Zëvendëskryesues u zgjodhën Murat Çelik përfaqësues i Atlantik Group dhe Ermal Hajdari përfaqësues i Ananas Impex. Anëtarë të Komitetit u zgjodhën Cihan Yılmaz përfaqësues i bankës TEB dhe Ediz Çabrati përfaqësues i kompanisë Burak shpk.

Kështu, Komiteti i Tregtisë u themelua si Komiteti i tretë i OTKT-së. Anëtarët e komitetit shprehën bindjen se puna e komiteteve do të jetë një mekanizëm efektiv për të ngritur zërin e sektorit privat.